1967 жылы 6 наурызда Жамбыл облысы Жуалы ауданы Кызыларық ауылында туылған. 1983 жылы қазақ орта мектебін бітіріп, сол жылы Мәскеудің Болат және қорытпа институтына оқуға түсті.
Жастардың «Мұрагер» (1989) Қазақ мәдени қоғамын ұйымдастырушылардың бірі. 1990-1995 жылдары осы қоғамның вице-президенті болып қызмет атқарған.
1995-1997 жылдары Қазақстан Республикасының Қарулы күштері сапында қызмет атқарды.
1998 жылы «Мұрагер» қоғамының президенті болып сайланып, ол қызметті 2009 жылдың соңына дейін атқарды.
Сонымен бірге 2004-2005 жылдары Мәскеудегі «Қазақ тілі» қоғамының төрағасы болды. Қазір «КазНефтеГазПром» компаниясының президенті.
Жәнібек Елекбаевтың басқаруымен «Мұрагер» қоғамы Қазақстанның Ресейде өткен жылы аясында ұйымдастырылған көптеген көрнекі істерге қолдау көрсетті. Сондай-ақ Ұлы жеңістің 60 жылдығын, Бауыржан Момышұлының 90 жылдығын және 100 жылдығын мерекелеуге ат салысты. Ол бірнеше мәрте Мемлекеттік және Қоғамдық ұйымдардың грамоталарына, дипломдарына ие болған.
Жамбыл облысы Жуалы ауданының Құрметті азаматы (2007). «Тың игерудің 50 жылдығы» (2004) және «Ерен еңбегі үшін» (2007) медалдарымен марапатталған. Қазақстан Республикасының Ауған соғысы ардагерлері қоғамының «Сауап медалі» берілген. 2011 жыл «Тіл жанашыры» медалімен марапатталды.
Сонымен бірге Қазақстан-Ресей қарым-қатынастарын дамытуға қосқан елеулі үлесі үшін Қазақстан Республикасының Ресей Федерациясындағы Төтенше және Өкілетті Елшісі Н.Әбіқаевтың Алғыс хатымен марапатталған.